لن اتكلم فكلماته يجب ان تكون فى البداية
.
.
.
باموت يامصر يامتباعه
باموت يامصر يامنهوبه
شمسك تسير عكس الساعه
والعين على العمى مغصوبه
الصفر خيم على زمنكو
عروق رقبتك مطلوبه
على الحدود قتلوا ولادك
وتقفى ساكته ومرعوبه
مدد ياهيكل يا ضميرى
مدد يا كامل يا زهيرى
مدد يا قاضى يا خضيرى
مدد يا مكى يازكريا
ياجورج اسحاق يا مسيرى
يابسطويسى ياحريه
مدد يا اجمل اعاصيرى
مدد ياقلب الوطن الحر
مدد ياسيره عوض المر
مدد ياندهه كمال خليل
مدد ياحلم ندى القصاص
مدد ياخط رؤوف عياد
شقيان وماشى بكل عناد
مدد يا قمح سكينه فؤاد
مدد يابنت يامصريه
ياجميله ياخت بهيه
مدد ياشعر العاميه
مدد ياصاحبى اللى قاسمته
مدد ياعلم اتعلمته
من عم عوده وصدقى عزيز
شباب لبس وش العواجيز
مدد ياسوره اخلاصى
مدد ياخويا وتاج راسى
يا معصراوى ياحسينى
مدد ياست نهى الزينى
يافجر صبح على عينى
صالح مابين نفسى وبينى
وقاللى دى الست القاضيه
كشفت عن الالوان زيفها
وخلت الورده الزاهيه تعيش
على وش خريفها
مدد يافادى يا اسكندر
على خطى محمد الاشقر
على طريق ابن ابو عبيطه
جمع مظاهراتنا مشاعر
ويغير من الهتافات شاعر
يحفظ ديوان لامين الديب
يلاقى شعر كانه اديب
عندك فى شعره بلاد تقاسيم
عندك حجازى وعمرو سليم
والنكته بوزاره تعليم
***********
باموت يامصر المتباعه
باموت يامصر المنهوبه
شمسك تمشى عكس الساعه
والعين على العمى مغصوبه
مدد يا وائل وياعيسى
مصر الشباب على الترويسه
فضحوا الوحوش السعرانه
اكلتنا جامع وكنيسه
مدد يا وائل ويا عيسى
مدد يا غد ويا كفايه
ابو العلا ماضى معايا
فى طريق مايعرفش نهايه
الا بميلاد مصر الحره
الا بميلادنا ومددنا
وكرامه تفضل لولادنا
مدد يا ايه فى سوره العصر
مدد يا تمثال نهضه مصر
مدد يافيلم صلاح الدين
مدد ياحماد ويا حمدين
متصدرين باسم الامه
للمجزره وقوانين سكاكين
للمبخره وقوانين زنازين
باموت يامصر ومخنوقلك
عبد الحميد شتا مشنوقلك
ميت علشان فرصته بتضيع
لولاد كلاب ولاد جرابيع
ثابتين على عرش فشلهم
نايمين على وش عسلهم
سرقوا الرغيف والحريه
سرقوا السياسه الخارجيه
ادوا الحرامى بنوك الوز
وادوله مصنع طعمه يلذ
وادوله فندق لجل يهز
وادوا الحديد لولاد العز
والبورصه محشوره فى جيبهم
والسد لو كنا نسيبهم
بميته وكهربته بكره هيدخل فى نصيبهم
مدد يا صوت عبد الناصر
مدد ياشيخ حسن البنا
نفسى فى شى قبل الجنه
يقوم بقا حزب وطنا
ونقضى على اللى مسرطنا
الليل يتوب عن كوابيسه
واشوف فى مصر رئيس سابق
والجى مايكنش وريثه
مدد يايحيى حسين يا امين
بيخصخصوا الهوا والميادين
بيمصمصوا الناس والفدادين
باعوا الطريق الصحراوى
وباعوا احلام الجامعه
وهتكوا عرض الشرقاوى
وعملوا بيصلوا الجمعه
باعوا وباعوا وهايبيعوا
شيخ الوطن ولا رضيعه
وباعوا صوت عبد الباسط
وشهر يوليه واسابيعه
**************
باموت يامصر المتباعه
باموت يامصر المنهوبه
شمسك تسير عكس الساعه
والعين على العمى مغصوبه
هاتى المدد يامنى الشاذلى
لاتخافى يوم ولا تتنازلى
وصورى مصنع غزلى
فى الاعتصام العمالى
انا كنت رب العوم مالى
مقتول غريق وياامالى
ادى الغريق والقاتل فين
مدد ياعبد الغنى ياحسين
صورلى مصر المحتاره
صورلى غرقا العباره
مالهومش حد ينجيهم
غرقوا بحاضرهم وماضيهم
البحر مافهوش قشايه
والملح نار جوه عقولهم
وعيون بلدهم نسياهم
ومناره الشط تخونهم
باموت يامصر الغرقانه
باموت يامصر المنكوبه
طعم الحياه كله اهانه
وانتى على النيل مصلوبه
مدد يابنت الايه يا الاء
ياحصه الوطن المشتاق
الاولى فى طعم التغيير
بشرى بالوان الطباشير
راسمه العلم فى الصفحه اسير
وبتعلنى بقلب الموجوع
ان الوطن ميادين ونجوع
تعبان من الحرمان والجوع
عين المراقب غفلانه
عن العيون الانسانه
بنت الخمستاشير احساس
بنت الخمستاشير تفكير
بنت الخمستاشير غنوه
على وتر علم التعبير
عين الملاحظ بتلاحظ
ان العقول جوه قوالب
مافيهمش خنساء ولا جاحظ
عين المصحح مبهوته
من الخطوط المفلوته
المصحح يانهار مقندل مش فايت
مش دى الاجابه المظبوط
هاضبط ياناظر واتصرف
الناظر يانهار مزفت ومدوحس
مش دى الاجابه العلميه
شيلونى هيلا يا افنديه
نوصل لحد المديريه
المدير انا مش مدير فى القصه دى
وعينيا مش شايفه قصادى
سؤالنا مافيهوش امريكا
والبنت هى المحقوقه
وضرورى قطعا مزقوقه
يااما حزب الله فى لبنان
لااما سوريا او طهران
او المقاومه العراقيه
قوموا بينا نعملها قضيه
ومن الاداره التعليمية
الى الادراه الامنيه
ادى سين سؤال انطقى ياالاء
منين عرفتى اساس الداء
مين بلغك ان المامور بيبوس فى رجلين الاعداء
مين جندك للشيوعيه
ولبسك اخوانجيه
انا؟
انا بنت مصر الحريه
ياديول ديول الحرميه
سرقتوا فرحتى بشبابى
سرقتوا بهجتى بكتابى
سرقتوا من لغتى الاولى
سطور فى كشكول التعبير
خدوا منى صفر على غباكو
والف صفر لكل جبان
ماذكرش درس عن الاوطان
بتتبنى بفكر وايمان
بتتبنى بدفتر مواليد
فيه الشهيد قبل الفنان
******
